Alla Itolae Nusa 32

Yakupe esi keu rame, eleki

Kena Yakupe iselu malekata meru, ibeteke be, “Meije Alla Eni solaluaru esi maka tola lakwai.” Hoko iono otoi mere esi nane Mahanaime.

Eleki Yakupe iulake tamata kena keu akmena leke tetue kwalini Esau mpai Seire me otoi Edome.

Yakupe ibeteke lokosi be, “Imi beteke ete kwaliku Esau be, ‘Au meije Yakupe, amu tamata makerike. Takwaline meije au rue kai memete Labane.

Meije au supu sapi, keledai, domba, pipi kai tamata makerike. Au ulake beteke ete ntuane ale be au hlaleke lalemue ndina.’”

Eleki esi keu beteke ete Esau. Pela pine esi leu beteke ete Yakupe be, “Ami beteke ete ntuane amu kwalimu Esau peneka, hoko kena meije iluake lomei sapa ntuane ale lomei. Ikeri kai tamata utuna ata.”

Kena Yakupe ilene mere rilai titinai kai kaplalei. Eleki tamata rebe sakesa kaine ilarakesi kena toini lua kai eni pipiaru, dombaru, sapearu kai untaru lekwe ilara kena toini luare neka.

Inoake be, “Sepo Esau iluake pine iatia toini sae hoko toini sae makete esi supu naya sa.”

Eleki Yakupe ikoti loko Alla be, “Upuku Abrahame kai amaku Isake esi Alla, lene loko au kotie beiMue noma. TUHANE Aulake au leu loko auku tapele kai auku luma toine peneka. Kai Ataluke be Aono pusulu mise ete au peneka.

Tamata ele mei aure, Ariluke misete ete au boka titinai ele meije saisa mo kai Anete loko saisa rebe Atalukele le kena au keu menaije au sabu kwele Yordane meije au lalake batuke toane buai po kena au sabu suike meije auku taneiaru lara kena toini lua peneka.

Au kotie bei Ale titinai, Araka au leke kwaliku Esau iono susate ete au yake. Rilaku tinake iluake bunu ami pusuma, auku binaru kai auku anaru.

Au kotie ele mere le TUHANE Ataluke ete au peneka be, Aono pusue yelu mise ete au kai Aono auku anubuaru esi boka eti neheke ruasi mone le esi boka saka ume me meite leine.”

Eleki kena kpetu mere esi ntulu ete mere.

Eleki irana bei eni binatanaru kena irilukelu ete kwalini Esau.

Binatana rebe iranalu ete kwaline, pipi inai utuna lua, pipi tulene inai butu lua kai domba inaije inai utuna lua, domba tulene inai butu lua.

Unta rebe esusu esi anaije sa inai butu telu kai esi anaiju, sape inaije inai butu ata kai sape tulene inai butu esa, keledai inaije inai butu lua kai keledai tulene inai butu esa.

Eleki irilukelu ete eni tamata makerikaru leke esi rakalu totoini. Ibeteke lokosi be, “Imi keu akmena kai imi raka leke imi tehaike lomai yake po totoini lau bei lomai toto.”

Yakupe ipleta eni maka kerike rebe keu akmenare be, “Sepo kwaliku Esau itetuemu, pine itneu be, ‘Amu elake kena sire? Imi keu loko etia? Kai sire eni binatana rebe imi kerilu meru?’

Hoko imi ralake be, ‘Meiju amiki elake Yakupe enie. Inatue meiju ete eni elake Esau. Ntuane Yakupe, amu makerike eri pamuli sa.’”

Kai ete eni makerike rebe tutumulie toini rebe esi akmenare kai toina rebe esi pamulire kai pusue tamata rebe iulakesi kena raka binatana mere ibeteke lokosi be, “Sepo imi teteue kwaliku Esau hoko imi beteke etei lupe minae au betekele neka.

Kai imi nete beteke etei be, ‘Amiki elake Yakupe eri pamuli sa.’” Yakupe iono ele mere le inoake be iamuti kwalini Esau laleije kena binatana rebe inatuelu mere hoko kena itetuine, kwalini inasukeni moneka.

Hoko binatana meru esi keu lelu akmena, po Yakupe kai eni lumatoini esi ntulu petu mere me tendare sa.

Kena kpeture Yakupe ikeri eni bina luaru kai eni binaru esi makerika luaru kai eni nanae butu esa lesini esa meru eleki esi sabu kwele Yaboke loko maka sabu lakwaije.

Hoko isabukesi pela eleki isabuke pusue eni taneiaru.

Po Yakupe irue ruai. Eleki mokwai sae me kai Yakupe luasi kola lomai eti kasinake.

Kena mokwai mere iblake be iono rua Yakupe moneka, eleki itutu Yakupe eni kbobaine eleki etasala.

Eleki mokwai mere ibeteke loko Yakupe be, “Tie au le totonai lemataije katabola ne.” Eleki Yakupe ibeteke be, “Sepo Ariluke misete ete au hoko au tie Ale.”

Mokwai mere itneu Yakupe be, “Amu nane sire?” Yakupe iombe, “Yakupe.”

Mokwai mere ibeteke be, “Amu nane Yakupe moneka po Israele le akola lomai kai Alla kai tamata peneka, kai alesi.”

Eleki Yakupe ibeteke be, “Ntuane Abeteke amu nane mina.” Po mokwai mere iombe, “Auku nane atneuke moneka.” Eleki Iriluke misete ete Yakupe.

Eleki Yakupe iono otoi mere esi nane Pniele, le Yakupe ibeteke be, “Au selu Alla kena mataku po au mata mo.”

Eleki kena lemataije katabolare Yakupe ikeu bei Pniele, kai kena mere ikeu sesea le kbobaine kera.

Hoko roma meije tamata Israele esi kane utane tinai rebe ekopa esi kobaine mo. Le Yakupe eni kbobaine supu tuture pe.